【本報訊】劉曉波可悲的遭遇，教當年為逃避中共而來港的倪匡對共產黨更感失望。「劉曉波係最溫和嘅異見分子，《零八憲章》從頭到尾，睇落去有邊啲損害到你共產黨利益？（相反）係維護你統治地位嘅憲章嚟。」他說，自己立場反共，但也相信劉曉波參與《零八憲章》是有其理念，但結果卻落得如斯下場。
「香港人心早就死咗」
劉曉波事件會否令港人更心寒？「香港人嘅心早就死咗，如果要寒都已經寒透，唔使再加任何嘢㗎喇。好似我咁樣，寒到。1984年中英聲明一出嚟，就知道玩完喇，死梗㗎喇。」
寧鳴而死，不默而生。他說港人對於中央種種干預等，雖毫無反抗能力，「但你一定要反抗㗎，所以𠵱家啲後生仔喺度反抗咪咁解囉。明知唔成功你都要反抗㗎，呢個係人性嚟。你一定要反抗，好似啲魚放喺砧板上面，佢一定會跳幾跳，係唔會瞓喺度撻喺度畀你劏吖嘛」。
不過他也承認「反抗唔反抗都冇分別，呢個係歷史宿命，中國幾千年來都係強權統治，你𠵱家形勢同漢唐清朝有咩分別，一模一樣，上面一個大皇權鎮壓落嚟。」
■記者翁煜雄