法庭噚日DQ咗4個民主派議員，民主派就驚緊補選之後，民主派拎唔番原有席位，保唔住立會地區直選組別過半數，點知熱血公民議員、「正白旗旗主」鄭松泰、同普羅黃毓民齊齊叫泛民議員總辭公投，有民主派議員即時諗，佢哋係咪覺得，建制派係補選搶民主派兩席未夠，要搶夠5席先好呢？
有民主派議員話，按現時形勢，民主及本土陣營九西、新東各有兩席出缺，一旦補選，兩區必有一席俾建制派搶走，民主及本土陣營變相少兩席，如果聽毓民、泰博講泛民議員總辭公投，即係五區都有兩席或以上空缺，一旦舉行補選，民主及本土陣營唔只輸兩席畀建制咁簡單，而係輸夠最少5席甚至更多，到時最開心係邊個？咪民建聯、工聯會囉！無端端分多幾個立會議席，咁究竟毓民、泰博建議，係幫建制派定幫民主派？咁就要大家自行判斷！