練馬師霍利時朝早在沙田馬場的督操習慣，不少馬迷都相當清楚，就是坐在高爾夫球車上，駕使至馬房閘口一角，在車上觀看戰馬操後準備返倉的情況。
不過，今朝（14日）霍利時卻有異動，罕有地不但只用眼睇，還離開高爾夫球車並「出埋手」，當旗下「比卡超」準備出跳時，霍利時緊張到自行走到馬匹旁邊，親自調校該駒的龍頭繩等裝備，向騎師麥偉利交帶清楚，才放行讓人馬往跑道彈泥閘，可謂有晒搏殺手影。
「比卡超」角逐周日（16日）沙田第11場二班1400米，此駒早前回勇重開勝門，6歲馬仍保持強橫戰鬥力。
翌仗於同程1400米拼入季軍，距離頭馬下屆經典一哩賽要角「當家精選」只個半馬位，加上「比卡超」今次抽1檔好跑，難怪霍利時今朝咁緊張了。