係人都知練馬師鄭俊偉鬥志如虹，皆因仍差一Win才夠16場達標，而今季只餘下周日（16日）一戰，唔心急就假咯。
除咗廐主非勝不可外，第七場三班1600米「嬴風雲」馬主馮國保，相信同樣極心急取勝。「嬴風雲」無疑今季已兩捷有交代，但俱只贏四班賽。
4歲澳洲馬「嬴風雲」出自去年香港拍賣會，身價350萬，須知馬會設有「香港國際馬匹拍賣會新馬獎金」，每一匹本港拍賣馬，在拍賣年度起至翌季結束前，若首度在三班賽勝出，馬主可獲60萬額外獎金，所以「嬴風雲」今仗是最後一次合資格爭60萬額外獎金，若下季才贏三班賽，已不會有這筆獎金。
「嬴風雲」近三仗兩度在同程1600米入Ｑ，反映近況仍甚佳，此駒後勁可靠，韋達騎慣騎熟，今仗除了703,950元頭馬獎金外，亦是最後機會爭奪額外60萬「拍賣會新馬獎金」，加埋有130萬，絕對唔係小數目，更何況鄭俊偉亦要力爭達標，所以唔榨盡隻馬就奇咯！