今年書展就快開幕，今次大會以旅遊做主題，旅遊書勢成主角，雖然一定有唔少遊記賣，但一向最暢銷嘅旅遊書，仍然以吃喝玩樂攻略本為主。有旅遊達人話，香港人外遊其實有唔少陋習，好似講嘢大大聲、掛住打卡、相機食先同浪費食物等等，令人好尷尬。
今次書展主題區「文遊四海」，係介紹本港旅遊作者古鎮煌、李樂詩、和攝影寫作人鄭幗恩，當中去過南美洲「天空之鏡」同「天空之城」嘅鄭幗恩（Celia）話，有時喺異鄉遇到香港人，都會好親切，但有啲港人行為，又令佢好尷尬。
遊日食壽司棄飯糰
Celia話有次佢帶攝影團去加拿大影極光，點知旁邊另一團香港人好興奮傾偈，大大聲講上次阿邊個喺邊度又影到、係囉要點影點影，破壞晒寧靜環境，嘈到連外國人都頂唔順，叫佢哋靜一靜。佢仲話，其實內地、台灣同韓國人等亞洲人嘅吵鬧情況，同香港人不相伯仲，可能因為東方人好似好易hyper。除咗易hyper，唔少人習慣去到名勝打卡影相，《西伯利亞夢想鐵路》作者Anyway慨嘆，如果打咗卡就好滿足，咁其實你去旅行定打卡呢？Anyway建議港人去旅行要感受在地文化，擺低手機先，唔好成日諗住點上網，有冇WiFi，用多啲時間同當地人溝通。
除咗打卡外，相機食先亦係好失禮。Celia喺日本小店見過一班港人影相影咗成十幾分鐘都未肯食，最後要老闆出到聲請，佢哋先肯起筷，Celia話其實都幾好笑，佢又見過香港人點到成枱壽司，但只係肯食上面舊刺身，飯糰變廚餘。
佢話好多地方食物稀缺或者依賴入口，食材珍貴，真係唔好浪廢食物，希望港人去旅行，喺食買玩以外增加其他體驗，如果給當地人留個美好回憶，將來對方對待其他旅客亦會友善啲。
李八方