星，全部都係星！12個國家、120位球星周四起一連四日雲集倫敦，出戰首次舉辦嘅Star Sixes六人足球賽。周四率先上演六場分組賽，壓軸由巴西火併意大利，結果森巴兵憑昔日米杜士堡「小巨人」祖連奴同前巴塞隆拿右閘比列堤入波，以2:1擊敗有前羅馬射手迪維基奧入靚波嘅意大利，係咪聽到啲名都覺得回憶返晒嚟呢？至於德國就喺波歷克領軍下，以4:3險勝擁有皮利斯同佐卡夫等壓陣嘅法國。
英格蘭雖然有謝拉特同奧雲孭飛，但喺主場都以1:4輸畀西班牙，其中菲臘尼維利一次控波有少少甩腳，即刻俾狂牛鐵衞佩奧爾出收山腳踩中小腿，前者痛到瞓喺地下，睇嚟Star Sixes唔係一般老鬼衞生波！
