「陳校長免費補習天地」同皇仁舊生會夜中學今年再次合辦資助基層學生嘅重讀計劃，更加大名額至20個，畀有上進心但有經濟困難嘅學生入讀。陳校長陳葒話，補習天地每年有約100個應屆中六生唔知自己升學路向，希望透過呢個計劃，減輕佢哋經濟負擔之餘，又可以繼續升學，申請學生需為綜援或全額書簿津貼考生。
皇仁舊生會夜中學校監陸偉雄話，夜校上課地點係皇仁書院，每星期五晚上課，每晚6時半至9時半上課，包括中文等4個核心科，同企業、會計與財務概論或經濟兩個選修科，現正申請開辦中國文學、中史同地理，又請立會議員梁繼昌同港大法律系教授張達明等舊生作分享，望可以藉舊生網絡，提供學業同職業導向支援。