政界盛傳建制背景、教聯會副主席蔡若蓮會出任教育局副局長，即時引起逾3,900位教育界人士聯署反對，計埋市民一共成萬個聯署，但特首林鄭當時回應「千幾人聯署好少」，簡直火上添油。主角蔡若蓮亦一直冇任何回應，噚日出席一個中港兩地青年交流計劃嘅啟動禮後，佢繼續龜縮，直言話「唔準備喺度評論最近關於我嘅討論」，又四両撥千斤耍官腔話「我理解大家好關心，我今日係冇準備就呢件事同大家討論」。逃避可恥亦冇用，不過喺港府做得官嘅人好似好多都係咁。
叫大專生北上交流
蔡若蓮噚日以青年事務委員會委員身份出席「飛越港蘇體驗計劃」活動（係一個中港兩地政府大力支持嘅計劃），叫大專生去蘇州、南京同上海進行為期4星期嘅交流同實習，活動仲有中聯辦協調部處長出席。
活動係咪建制背景就唔敢講，但就同蔡若蓮都幾理念一致，佢話要為年輕人打氣，希望中港兩地互相配合喎。不過，交流完係咪能夠配合真係不得而知，只知如果蔡若蓮入主教育局，八方會為年輕人揑一把汗。