與友人飯局，不忘評論近日樓市話題，大家一起扮專家評估樓市何時爆煲。友人話好多人話可能明年上半年，所以租住樓先等出年爆先入市；我說仍未見到爆煲的急切性，爆煲前沒有人可以話給我們聽（也不會相信），只是看爆煲後邊個走得快，老樓指去年樓市弱勢時叫人大膽還價三成，𠵱家肯減3%已經好少，反映冇人相信已到了爆煲期，只要有一個引爆位，那麼跌市便好快嚟到。
過往多次金融危機，不外乎資產價格急跌引發掟貨潮；一係銀行收緊資金渠道導致資金鏈斷裂，為求自救便要斬倉。老樓一直指現時看兩個元素，包括港滙價和市場情緒轉為悲觀，這兩個元素已經醞釀當中，若果外圍包括銀行倒閉或是國家收水，市場由喜轉悲便是跌市的時候。
老樓同友人講，若未有樓真的要等真爆，便不是首年便可以上車，因為初期以為稍作調整便會急促回升，過往多次便出現小回大漲的例子，買家亦受了多次假跌市的教訓，當調整市初期鬥快趁低吸納，這群人也知道調整市很短要等平貨並不易，仲要與地產代理打好關係先搵到平價貨。至於代理點解要把平貨給你，除非你是熟客甚至資深投資者，多做成交貨如輪轉，多做幾轉便可以收多點佣金，畀一位用家起碼有幾年不會換貨，故此永遠買不到最平貨。
根據大跌市經驗，首年要忍手，等多點壞消息連環爆發後一次過試底，可能時間長達三至五年，若然大家真的沒有這個耐性，這種方式並不適合大家。
劉兆昌
資深地產傳媒人
http://www.HKLau.com
本欄逢周五刊出