阿仙奴同利物浦新球季響頭炮！英超各路雄獅陸續展開新球季備戰工作，其中兵工廠周四喺澳洲作客澳職冠軍FC悉尼，重點新兵拿卡錫迪只係後備上陣約22分鐘就射入處子入球，帶領「槍手」贏2:0，另一位新兵哥拉辛拿斯則喺3-4-3陣式中擔任正選中堅，表現同樣令人滿意。至於紅軍周三則作客4:0輕取非聯賽球隊燦美爾，新兵蘇蘭基同樣有唔錯表現。
阿仙奴嘅3-4-3陣式，鋒線以奧斯爾拍禾確特支援箭頭韋碧克，後防起用施治把關，新兵哥拉辛拿斯、隊長梅迪薩卡同新秀拜歷組成三中堅，中場除高基連外，盡用韋洛克等三位青年軍。
韋碧克射失12碼
梅迪薩卡開賽四分鐘就藉一次角球攻勢，禁區內混戰下伏兵門前「半倒掛」射入。雖然上半場阿仙奴撳住踢，不過就係都入唔到第二粒。換邊後阿仙奴只以後備門將達米安馬天尼斯入替施治，其餘十人不變，去到55分鐘，韋碧克主射12碼，但俾悉尼門將列馬尼撲出。
直到68分鐘，阿仙奴領隊雲格終於忍唔住，「新九號仔」拿卡錫迪入替「禾仔」上演「地標」戰擔任左翼，加埋基奧特同小將尼基泰亞組成鋒線，同時盛傳扭計要離隊嘅阿歷斯張伯倫都上埋場，再次客串右翼衞。
雲格今次換人有成果，去到83分鐘，拿卡錫迪喺12碼點附近接應尼基泰亞嘅右路地波傳中撞射得手，射入加盟槍手後第一球，阿仙奴順利以2:0擊敗悉尼FC，睇嚟今次兵工廠冇買錯人。