為咗紀念「斜坡安全系統」成立40周年，土木工程拓展署特別舉辦專題展，提高市民嘅防災意識，展覽有嘢睇有嘢玩仲有大把嘢拎，政府今次真係好揼本。
相信大家都聽過虛擬實境㗎啦，展覽入面有虛擬實境體驗區，重新呈現45年前6.18雨災山泥傾瀉嘅情況，真係夠晒震撼，仲有成3個咁多，俾你玩到夠。如果受唔住咁大刺激？唔緊要，呢度仲有得自製明信片，啱晒安靜嘅文青。場內仲有專人教寫西洋書法，寫好之後蓋埋個靚靚火漆印就可以寄喇，仲有得揀即日寄或一年後寄㖭。
一家大細又啱唔啱玩？一樣啱，展覽仲有得比家長同小朋友一齊砌Lego，每日都有唔同公仔可以揀嚟砌，砌完再整埋個卡片套仲可以攞番屋企。展覽即日起至17日喺中環元創方舉行，費用全免！