夏天熱辣辣，梗係要飲番杯冰凍嘅啤酒爽一爽啦。嚟緊星期六、日就係一年一度「蘭桂坊音樂啤酒節」，蘭桂坊將會變身七彩熱帶綠洲，提供逾100款嚟自世界各地嘅優質啤酒，包括大受女士歡迎嘅西柚味同檸檬味果味啤酒，當然唔少得大圍啤等呢啲本地手工啤啦。
Party仲網羅咗各國精選美食，有即燒北海道巨型扇貝及燒蠔、大大粒章魚燒、意大利烤豚肉三文治、特製酒味意大利雪糕等，諗得出都有，全部賣廿蚊起。同場仲有22支本地樂隊包括Dusty Bottle、Nasty Dudes等奉上精采Live Music，首屆「蘭桂坊街頭調酒比賽」同超過60個攤位遊戲，真係玩足全日，難怪蘭桂坊之父盛智文噚日喺啟動禮咁hyper。