前日係一年一度DSE放榜，6位考獲7科5**嘅狀元自然成為各大傳媒追訪對象。當問到幾位狀元大學想升讀邊科，佢哋不約而同話要讀醫。唔做大律師去做補習名師嘅林作，就喺Facebook發表出位言論，批尖子「自慰式」埋首喺自己狹窄專業，讀書最勁嘅人去晒做醫生同律師，非香港之福。
讀書叻嘅人去晒做醫生，點都好過個個去做律師、精算師、會計師，起碼香港缺醫生，而且醫生都係對社會有幾大貢獻及影響嘅行業，同時，醫生係需要叻人去做。不過，我諗林作嘅意思係批評呢啲尖子根本唔係為興趣而從醫，而係為身份、地位、錢。
人各有志，有人為功名利祿亦無可厚非，唔通林作又真係對教育充滿熱誠，志在作育英才，先去做補習名師？喺香港可以講興趣嘅人一係好有勇氣，一係好有錢。
有人踩叻人個個去讀醫嘅時候，為興趣而讀文學、科學、社會科學嘅人有苦自己知。辛辛苦苦讀完大學，搵工最難係佢哋，人工最低又係佢哋。能夠讀自己有興趣嘅科係開心嘅，因為各種考慮而揀有前途又有錢途嘅科，又唔使俾人批鬥囉。有能力，邊個唔想讀醫？
風吹知
http://www.fb.com/windknows/
本欄逢周五刊出