利物浦方面，雖然新兵穆罕默德沙拿因為工作證問題冇得踢，拉爾拉拿、菲臘比古天奴同沙迪奧文尼亦都唔夠態俾高路普收起，但紅軍依然靠占士米拿、馬高古積、20歲西班牙小將捷利維拿同活特本各建一功大勝燦美爾4:0。
紅軍蘇蘭基間接建功
除咗門將卡利奧斯，高路普半場換晒其餘10個人，其中今夏由車路士加盟嘅19歲英格蘭新星蘇蘭基首次着上紅軍波衫表現都算唔錯，下半場一次射門俾對手門將擋出，造就捷利維拿執雞射成3:0，但最令利迷開心，相信係隊長佐敦軒達臣自二月因腳傷缺陣後再次馳騁場上！紅軍周五將作客友賽韋根，然後就東來香港出戰英超亞洲挑戰盃，下周三會對水晶宮。
不過領隊高路普講明，沙迪奧文尼大傷初癒，只會留喺英格蘭同U23訓練，慢慢提升狀態同加強大腿的肌肉力量，香港球迷冇機會見到佢喇。