今年42歲嘅藝人陳昭昭去年發現拍拖兩年嘅李姓男友瞞婚，不過事隔半年兩人已和好如初，仲訂於今年12月7日喺香港擺50圍酒，趕今年雙春兼閏月，下個月又會到外地影婚紗相。
昭昭噚日接受電話訪問，佢承認好事近：「係呀，年底會喺何文田間ClubONE擺50圍酒。知道男朋友已經搞清楚，希望佢以後乖啦。早排已經試咗婚紗，8月去柬埔寨皇宮影婚紗相。因為雙方都有好多親戚朋友，又有演藝界朋友同外國朋友，所以要擺50圍至夠。會晏晝行教堂，夜晚擺酒。」
網上直播婚禮
講到婚宴昭昭話唔想寒酸，所以會有啲小禮物同搵藝人表演，希望搞得好好睇睇。目前已經搵咗李國祥同杜大偉表演，構思係陳欣健做婚禮司儀，到時婚禮會喺YouTube直播。至於婚後會不設防盡生，未來老公鍾意囡囡，昭昭本身就冇乜所謂，仔女都係神嘅安排。暫時未排期註冊，因為要等神父喺教會嘅婚姻法庭辦手續。
撰文：馮仁昭