嘩嘩嘩，特首林鄭月娥上場後，行政立法關係似乎真係大躍進噃，成個新班子，積極同各黨派connect，拉票之餘又努力同傳媒保持良好關係，噚日立法會今個會期最後一次會議，政務司司長張建宗就親自落場，喺收爐日買咗幾盒餅撻親自派畀記者，又大讚新聞界任勞任怨，以往真係冇乜見過CS親自捧餅做推銷員噃，一打呔返工就興奮嘅張建宗，真係為咗份工瞓晒身。
鼠王芬巨峰酬賓
張建宗喺噚日下午親自攞住幾盒餅撻現身，睇番吖，餅撻嚟自泰昌餅家，即係前港督彭定康經常幫襯嗰間，為令呢場公關騷，滲入唔少港英味。其間，張建宗好慈祥咁話，奉上小小心意，繼而大讚新聞界「任勞任怨、全天候服務」，認真辛苦晒，仲話若然唔夠，可以拎埋前廳嗰幾盒出嚟，原來佢同時買咗餅撻畀議員醫肚，誠意十足，但如果肯重開公民廣場，相信同傳媒關係會更好！
民建聯黨團同樣有向記者大送散水餅，有別於張建宗，佢哋唔係請食蛋撻，自然就冇乜港英味道！經民聯梁美芬索性唔送餅撻改贈生果，自己親自捧咗3款提子出嚟，包括「巨峰」、「香印」同「晴王」，後兩種青提幾百蚊一梳，出手好疏爽。鼠王芬話時令生果購自油麻地果欄，希望可以幫記者補充多啲維他命C。
李八方
