C朗獲准延長假期，唔使咁快隨隊飛去美國備戰國冠盃，可以繼續同似乎真係有咗嘅女友佐真娜、親朋戚友等喺西班牙度假。不過，西班牙八卦雜誌《Hola》日前就影到，有幾位海關稅務局職員，荷槍實彈坐橡皮艇登上C朗嘅遊艇調查（左圖），搞到C朗「O晒嘴」，唔通同佢涉嫌逃稅1,470萬歐元單案有關？好在當地官員表示只係例行檢查，確保出租船隻有辦妥稅務文件，應該同C朗被指逃稅無關。
既然只係虛驚一場，C朗自然有心情喺社交網站大騷「爆肌」身材，但今次就有特別玩法，搵埋媽媽Dolores、小C朗同埋啱啱出世嘅龍鳳胎等粉墨登場，仲話呢個係「充滿愛嘅大家庭」！不過，網民焦點就落喺早前盛傳有喜嘅佐真娜身上，見手抱BB嘅佢肚凸凸（圓圖），球迷們睇嚟可以預先恭喜C朗又做老竇啦！