國企中遠海控（1919）日前宣佈以492億元，收購前特首董建華的祖業東方海外（316），每股作價78.67元，即使東方海外半年來早已被大陸佬炒高咗八成，但呢個收購價依然較公佈前股價高出31%。單計董建華本人，佢持有東方海外實質權益約30%，即今次賣家當，他個人可以淨袋148億元。那班「智囊」以後唔使再周圍揼地產商心口，一於董伯伯自己出錢出力建設愛國愛港大業，記得投資一帶一路啊。
是次交易作價，相當於東方海外帳面值1.4倍，比全球最大航運公司馬士基去年併入德國漢堡南美船務時的1.3倍仲要高，難怪有人會質疑中遠的出價，可能包含了政治報酬。據講，中遠一方對於「買貴嘢」係咁解釋嘅：1.東方海外係好公司，溢價係包埋買佢嘅商譽；2. 東方海外係well-managed，中遠可以提升自身兼有協同效益；3.受惠行業整合，香港去美國西岸的貨櫃運費，已由去年的低位反彈超過1倍，東方海外作為少數在西岸有碼頭的公司，中遠買埋佢，係食到未來幾年的復蘇嘅。除了第三點海迪無意見外，作為對「建華八年」有深切體會的香港人，首兩點真係不敢苟同，對於董氏一家的能力及智商，相信大家自有判斷。
提醒番，今次交易並非沒有暗湧，事關仍要待美國、歐盟的反壟斷審查批准。有口痕友就話，今次交易雖然和以往中資對外做大型收購一樣，係有失敗分手費的安排，如果交易拉倒，中遠要賠償2.53億美元（約19.7億港元）畀董家。但與正常做法不同嘅係，今次交易條款講明，如果是因為美國或歐盟反對而令交易失敗，係豁免唔使賠㗎。咁嘅安排，唔多唔少都反映中遠的憂慮和董家的議價能力。
東方海外交易公佈後，股價一直徘徊在71、72蚊左右，和中遠提購價的差距，高近一成。
海迪