幾支英超勁旅都喺呢個星期開操，同埋開始踢季前賽熱身，車路士、阿仙奴、曼城、曼聯同埋利物浦喺轉會窗都已經有斬穫，新兵趕得切參加集訓，相信有助佢哋備戰新球季。
曼聯呢兩季增兵，直頭好似將轉會部門外判咗畀拉奧拿搞咁，呢兩季加埋六個新簽嘅一隊球員入面，有四個係拉奧拿嘅球員。上季簽嘅四個新人入面，三個係拉奧拿嘅人，而啱啱簽入嘅盧卡古（圖），又係拉奧拿旗下嘅球員。雖然伊巴謙莫域今夏離隊，但紅魔陣中都有四位拉奧拿嘅球員，包括盧卡古、保羅普巴、米希達利恩同埋羅美路；而前三者就係拉奧拿旗下身價最高嘅三個人。
既然曼聯咁鍾意靠拉奧拿，不妨估吓下一簽會係咩人？紅魔今夏已經買咗前鋒同中堅，而且上季先後放走咗舒尼達連同舒韋恩史迪加，相信有機會要買番個中場嚟用吓。望吓拉奧拿啲人，覺得巴黎聖日耳門嘅馬度迪好有機。雖然佢已經30歲嘞，但同巴黎聖日耳門份約出年就完，相信轉會費唔貴，嚟到曼聯可以博份高薪長約到老，而且摩連奴亦鍾意同擅長用成熟球員。
短期嚟睇，曼聯靠拉奧拿簽人嘅策略夠晒效率，但一隊波入面有四個人同屬一個經理人，其中三個仲要係正選主將，硬係覺得有潛在問題。前曼聯領隊費格遜講過，話拉奧拿係信唔過。今日曼聯出得起錢，拉奧拿叫佢哋去晒曼聯，但難保某日曼聯達唔到佢某啲條件，就利用球員發動兵變，到時不堪設想。諗諗吓，希望唔好開口中真係去簽馬度迪返嚟啦。
文：咖喱