今個馬季仍未完，雷神莫雷拉已獲169Win破了自己的香港紀錄。能夠贏咁多場，關鍵之一就係無論乜賽事都唔放過，大賽又好，五班賽亦好，總之見到機會馬就搶走。
好似周日（16日）沙田煞科戰，雷神就奪去上仗由何澤堯跑第二之「神電金剛」，這匹葉楚航馬房7歲馬，將角逐周日五班草地1800米。過去雷神騎過「神電金剛」3次，得冠亞季軍各1次，非常合拍。但此駒今季12次出賽，雷神一次都唔肯騎，結果牠亦無法勝出。直至上仗同程田草1800米，配何澤堯入Ｑ只不敵「友瑩采」，賽後雷神即搶回帥權。
「神電金剛」本周一已由雷神重新過檔，拍跳彈草閘操練，盡力催谷狀態，力爭贏馬唞暑。「神電金剛」上仗何澤堯其實發揮甚佳，但雷神今季曾幫同主「神寶金剛」開齋，同幕後關係好，何澤堯雖然騎功唔錯，但試問又點夠雷神爭吖？