新一屆司局長上任後，副局長同政治助理料8月出爐。近期政圈傳有傳媒人加入熱廚房做政助，包括無綫首席記者、《講清講楚》台柱吳璟儁（圖），現年33歲嘅佢先後喺中大政治與行政學系以及英國布里斯托大學國際發展學系碩士畢業，專跑政治新聞，難怪盛傳係獲政制及內地事務局羅致。
咦，盛傳中嘅政制局副局長人選，即係運輸及房屋局副秘書長陳帥夫，同吳璟儁一樣，都係新界鄉議局元朗區中學嘅舊生喎，連同前政制局局長譚志源都係校友，呢間中學仲唔係政制局官員搖籃？
之不過咁，有人招手都要有人肯點頭先得，同時亦要經過政府遴選程序同品格審查等，暫時嚟講仲有好多未知數！至於吳璟儁，佢回覆時話至今都未有辭職，仍然喺原本崗位，「工作如常，多謝關心」。