要數一眾新丁局長上任近兩周嘅表現，似乎運輸及房屋局嘅陳帆較為凸出，落區探基層時幾度哽咽，更提出可以津貼社福機構經營劏房，佢噚日透露政府有意牽頭推出「同屋共住」房屋，畀輪緊公屋嘅市民入住由私樓單位分間而成嘅單位，其中一個模式係類似過往《七十二家房客》模式，即係單位中嘅廚房、廁所等設備由租戶共用，仲話計劃係想促進租戶之間嘅互動同溝通。
稱可增租戶間互動
陳帆呢個建議，勾起那些年唔少人嘅回憶，皆因《七十二家房客》係香港70年代經典電影，拍出七十二家租客同一屋簷下共住嘅境況，可算唔少人嘅集體回憶，估唔到時代進步咗、住屋模式卻去番舊時噃！
陳帆噚日喺電台節目形容，呢個模式可以增加住客喺單位內嘅活動空間，亦可令不同租戶間有更多互動機會，估唔到連住屋問題佢都希望市民可以密切connect。
雖則陳帆未有具體建議，但佢話預計每個分間開嘅單位面積約100呎，希望可以同業主取得共識，以較低租金租畀輪候緊公屋嘅住戶，希望最初有「一百幾十間未劏單位」參與計劃。
民主黨房屋政策發言人尹兆堅就唔多like陳帆連日出口術，指對方上任至今，實則未提過任何長遠同具體嘅房屋規劃方案，連日炒作短期而效果低嘅措施，亦指對方不諳港人嘅住房需要同期望，官僚心態離地，所謂七十二家房客嘅模式係一種倒退，強調多數香港家庭（包括劏房戶）都想有獨立而私隱嘅居住空間，預計七十二家房客模式未必受歡迎。
李八方