成日話「女人有兩個胃」，其中一個係用嚟食甜品，一田行政總裁黃思麗（Susanna）嘅另一個胃就唔係用嚟食甜品，而係飲酒。
Susanna噚日同傳媒食晏介紹將軍澳新店，接近尾聲，輪到熊本熊蛋卷出場時，Susanna就停晒手，原來佢唔鍾意食甜品，反而對酒就好有興趣，自爆係個「酒筲箕」，閒時會同朋友飲番兩杯。
佢順便介紹，新開嘅將軍澳一田超市有個「日本Sake吧」，畀客人可以喺超市買完生蠔或其他小食後，嘆番杯清酒，真係夠晒Chill。
佢指，將軍澳一田係首間有Sake吧嘅超市，觀塘一田只可以飲啤酒，兩間都有酒牌。
講到Sake吧嘅鎮店之寶，登登登凳，就係日本球星中田英壽同高木酒造共同釀製嘅清酒「N Sake」，呢支Sake全球只得500支，其中，香港有200支，一田就買入咗幾支。
一支750ml售價大約8,000元，Susanna話，N Sake喺市面都好難買到，而為咗杜絕炒家炒賣，一田唔會出售成支N Sake，拆開一壺180ml賣1,500元，一杯50ml就盛惠550蚊，認真係啖啖「金」露。