睇吓近期有咩電影上，就知道暑假嚟緊，好似新蜘蛛俠、壞蛋3等，當然最期刻係大導演基斯杜化路蘭新作《鄧寇克大行動》，喺小弟心目中，《雷霆救兵》係最正二戰電影，睇吓鄧寇克大行動有冇得挑戰佢嘅神級地位。電視台都有猛劇賀暑假，梗係唔係講緊王晶套所謂賭片，小弟唔小心睇過兩三集，除咗荷蘭叻做情聖媾港姐冠軍外，就係佢哋班所謂徒弟媾嚟媾去，都唔知同個賭字有咩關係。相反凌晨場剛剛開始播嘅《天地豪情》仲精采，單係羅嘉良、黃日華、陳錦鴻，都夠晒好戲，仲有奸到出汁嘅張家輝，其實大台有冇考慮過放返天地豪情喺九點半重播呢？
進入職場，除咗教師，有暑假真係唔多，職業足球都叫做有，不過隨住球員薪金攀升，球會又要搵多啲外快，強隊唔係去亞洲就要去美國，參與季前表演賽搵吓錢，好似阿仙奴，今日已經喺澳洲友賽FC悉尼，之後又要去中國。
講起阿仙奴擴軍，暫時都仲對辦，或者其他球迷焦點係破球會轉會費紀錄嘅前鋒拿卡錫迪，小弟就更關注左翼衞哥拉辛拿斯（圖）。自從雲格上季尾改踢3-4-1-2陣式後，戰績有明顯改善，雖然拎唔到前四，都叫食尾糊贏英足盃。右翼衞無論用阿歷士張伯倫定比利連，問題都不大，但左邊就弱少少，蒙利爾對抗性唔夠高，基蘭基比斯腳下功夫麻麻，成日助攻上前都誤傳。哥拉辛拿斯身材唔錯，之前踢史浩克04仲可以客串吓中堅，打左翼鋒又夠晒助攻力，上季假假地都係德甲後衞組助攻王。而且只不過24歲，體力充裕，打晒成條左路都冇問題，有德甲背景，同梅菲達斯、奧斯爾等都啱咀型，似乎入啱貨。
文：牽牛