【爆相爆片】現年35歲的黃心美與台灣老公Thomas拍拖五年半，結婚四年半，因聚少離多而離婚收場，更發表要精子不要男人的宣言。近日有指她與保釣烈士陳毓祥囝囝、ViuTV藝人陳安立約會，被影到兩人孖咇放狗，繼而傳出緋聞，不過二人齊否認戀情，男方雖大讚對方是好女仔，但就指零發展空間，更自嘲精子不夠優質。
失婚的黃心美異性緣旺，日前她被本報讀者林先生透過「爆相爆片」，目擊她與一名四眼男在灣仔撐枱腳嘆意大利餐，林先生表示：「間餐廳多數係外籍客，嗰晚約7點幾，黃心美戴住副有框鏡入嚟，同行有位高大有型男士，年約30多歲，佢哋好好傾，因為餐廳幾滿，佢哋只有坐吧枱，坐低咗，黃心美就放下戒心除咗眼鏡，佢哋一齊叫嘢share食，女嘅飲啤酒，男嘅飲cocktail。」林先生就聽到黃心美向男伴提及翌日工作安排，當時她更刻意轉身同對方傾偈兼放電：「撥長髮至少50次，佢哋一碟意粉兩份食，行為親密，男嘅仲將手搭咗去黃心美背，傾傾吓又伸手輕拍女方背部，似係安慰佢，佢哋好似熱戀情侶。」
「畀啲空間我」
對於被爆有四眼男新歡，黃心美就回覆本報：「係呀，我嗰晚同朋友喺灣仔食pasta，普通朋友食餐飯，咁朋友唔係男就係女，好多謝大家咁關心我嘅感情生活，但以我咁直率性格，我有好消息會話畀大家聽，希望大家畀啲空間我。」
採訪：陳杰