好多年前當差嘅時候，我唔想提自己個名，大家都叫我663。後來因為一個叫阿菲嘅女仔，我冇做警察，反而頂咗間小食店。嗰陣阿菲係空姐，成日周圍飛，直到有一晚我哋久別重逢，佢終於決定降落。不過我冇佢表哥咁識做生意，賣嚟賣去都係廚師沙律，好快啲客就厭，而阿菲亦過厭咗咁貼近地面嘅生活。有一日佢忽然講：「未去加州嗰時，我以為好好玩，去到加州，咪又係咁。」三年之後，我執咗間小食店，而阿菲亦做返空姐。自由就好似一萬尺高空嘅空氣一樣，唔係個個頂得順，至少我就唔得。阿菲走咗之後，我忽然間覺得前路茫茫，甚至乎搞唔清自己係咩人。試吓學人做地產，雖然我曾經係正式錄用嘅警員，但原來都唔夠啲行家打，咪練吓詠春囉。學咗幾年，結果都係俾人用MMA打斷幾條肋骨，唯有轉行。我嘗試發掘自己嘅優點，發覺成世人最叻嘅，就係同死物講嘢，但點搵食呀？後來有個姓洪嘅朋友同我講：「邊個話同死物講嘢賺唔到錢？事在人為嘅啫。」就係咁，我成為咗一個「死物傳譯員」，負責同客人帶嚟嘅死物傾偈。其實世界上每樣嘢都有佢嘅回憶，我嘅工作就係同死物溝通，然後記錄呢啲回憶。曾經有個客人畀我睇一張六合彩攪珠相，叫我問吓啲波下期出咩。我嗰陣先發現，原來隔住張相都傾到偈，或者係因為開咗wifi。不過啲波話佢哋呢行要守秘密，死都唔肯講。嗰次之後，我開始望住啲貓貓狗狗嘅相傾偈，估唔到好好賺，搞到越嚟越多人入行。雖然我只係同死物溝通，但幾年後呢份工多咗個名，叫「動物傳心師」。我唔想呃人，唯有又轉行囉。我係個唔鍾意出街嘅人，但以前偏偏做差人，日日行街，識親啲女朋友，個個鍾意周圍飛。諗返轉頭先發覺：人最鍾意做嘅，可能就係嗰啲唔啱自己做嘅嘢。係咪咁話呀，加菲？