人逢喜事精神爽，準新郎哥練馬師賀賢正是表表者，今晚（12日）佢喺全季谷草終極戰尾段發威，先由史卓豐贏第六場102倍「勤德兼備」，然後第七場三班1800米賀賢再下一城，旗下大熱「慣勝聆聽」在潘頓胯下建功，賀賢起孖為自己送上最佳結婚禮物。而「慣勝聆聽」單Win及組合獨贏A1分別派42.5及22元。
四歲馬「慣勝聆聽」早前從蔡約翰轉至賀賢馬房，結果搵到第二春，連同今仗在賀賢旗下三戰全配潘頓，拎冠亞殿各一。其中今場沿途居中，直路中段潘頓仍按住不騎，臨尾一經催策即如炮彈般，幾步間彈甩對手1.5馬位，既係本身首勝快活谷，亦係轉廐後初次勝出。馬主鞠應悌博士這晚身穿螢光綠西裝現身拉頭馬，在黑夜中零舍搶鏡。
潘頓這晚贏第三場「綽綽有餘」、第四場「紅星」及第七場「慣勝聆聽」中三元，提前勝出今季最後一次谷草騎師王。
講番賀賢，佢同前港姐亞軍李姿敏早已訂婚，馬季唞暑前就會離港，同未婚妻前往澳洲籌備婚禮，終結鑽石王老五生涯，難得結婚前起孖而回，「勤德兼備」、「慣勝聆聽」包辦第六口孖寶，派彩冷至2,703元，可謂大有斬獲。
第七場二至四名由「閃電王」、「雷公鑿」與「奇真」順序瓜分，四重彩派二萬三千幾。其中「閃電王」由停賽期滿之蔣嘉琦操刀，此馬練馬師告達理整晚合計出三駒，成績冠亞季各一，堪稱近期代表作。