這個年頭識得影靚相，人人都可以搖身成為Ig女神。選美出身的倪晨曦（Elva），身兼演員、模特兒、節目主持及瑜伽導師多職，有氣質又有內涵，早前拍攝真人騷節目《全職媽媽放大假》，真性情更為她贏盡觀眾歡心，「就算喺鏡頭，觀眾都會直接睇到你係點嘅人。」
統籌：林妙萍
撰文：陳蔚渝
攝影：周樂恒
化妝：Elva Ni
髮型：CarrieCammy of Queen's Private i
倪晨曦是美妝達人，接受訪問拍照，都是自己操刀。她平日最愛在網上頻道分享旅遊與美妝，由影相、執相、拍片、剪片都一腳踢，工作關係更差不多每月都要飛，加上做瑜伽教瑜伽，忙到連休息都沒時間，所以她決定今年成立工作室，組成團隊分擔工作之餘，更希望提高影片質素和拍攝更多不同類型影片。
挑戰打拳
一直都以旅遊與美妝影片為主的Elva，今年會嘗試分享做運動方面，「運動一路係自己唔敢掂嘅範疇，因為驚拍得唔好，加上自己要求高，唔想拍出嚟唔靚，運動係呢幾年先接觸，我想真係畀到正確知識大家，有咗studio可以放多啲時間喺呢方面，一啲大家可以喺屋企做到嘅，我都會拍。」Elva是瑜伽高手兼導師，但當初只不過是為了保持模特兒身形，「我做咗之後成個人開心咗，改變咗好多生活習慣，原來運動可以對一個人咁大影響，所以就好沉迷，又去讀training，又去拜師。」而今年更會有新嘗試，「之前有個訪問試玩咗打拳，玩咗15分鐘就流晒汗，做瑜伽我未試過流咁多汗，心跳咁快，呢樣嘢我好渣，所以好想挑戰自己睇吓可以做到幾多，就開始咗打拳。」
怕咗細路
之前拍攝真人騷節目《全職媽媽放大假》，Elva體貼地照顧小朋友，令她贏盡觀眾心，現實中她又可會想做媽媽？她說：「好矛盾，因為我妹妹有兩個小朋友，同佢哋玩，好開心好簡單，但拍完個節目令我有少少驚咗，因為嗰一刻覺得真係好辛苦，節目入面我完全冇時間化妝、set頭，你見我成日好亂，因為我一開眼佢哋要起身，就要整嘢食，送佢哋返學，之後又要準備午餐，所以覺得做媽媽好辛苦，個矛盾係鍾意小朋友，但要畀好多心血。」對於婚姻又會否有憧憬，「啱啱嚟香港做訪問，嗰時24歲，我就答30歲啦，轉眼今年都30，我又喺到諗其實都唔使急嘅，隨緣啦，婚姻係兩個人嘅事，溝通需要時間相處，所以唔會plan住。」
不過Elva在鏡頭前的真性情，為她贏盡觀眾歡心，「做自己最緊要，你係點嘅人，就唔好專登喺人哋面前扮一啲你唔想要嘅嘢，因為就算鏡頭，觀眾都會直接睇到你係點嘅人。」
【有愛的女神】
對於被封為宅男女神、Ig人氣女神，這些稱號倪晨曦又有何看法？
「我好感激大家稱我做女神，因為係一個好正面、開心嘅一個字，正如我鍾意一個女仔，我都會叫佢女神，你有愛嘅成份先會用呢個字，但我唔會睇得太重，做自己最緊要。可能我平時拍嘢夠真，令人哋都覺得我原來唔係淨係睇相，得一個model咁嘅樣，可以好親切，同大家講笑冇所謂。」
更多精采時尚內容，盡在 http://add.appledaily.com 。