本屆立法會會期本星期結束後休會放暑假，新民黨主席葉劉淑儀同容海恩趁最後一次大會請記者食壽司，慰勞大家呢一年咁辛苦，特別係特首選舉時日日跟住佢採訪喎！
忙完第一個會期可以唞下，葉劉透露即將去歐洲7、8日，主要去捷克布拉格同希臘雅典及附近小島，查實都同一帶一路政策有關，佢之前搞咗個「海上絲綢之路協會」擔任聯席主席，原來有港生因此計劃喺布拉格同雅典實習，所以佢順道探訪學生，仲約雅典市長見面交流！
難得放假，葉劉都想同囡囡一齊出埠，但阿女要返工，之前仲去上海出差4個月，暫時唔知呢個暑假就唔就到時間。講番今個會期，葉劉指少咗掟嘢場面，但工作進度比以往慢，不點名話立會有啲新丁議員求知慾太強，開親會都大把嘢問，希望大家熟習立會工作後會議更暢順。