近十幾年劏場新聞不斷，最新屯門「壹號總站」一個實用面積44呎的蚊型舖位最近以81萬轉手，兩年前小業主用292.5萬買回來，賬面勁蝕211.5萬，扣除經紀佣律師費等，堅係渣都冇得剩！
兩年多前我有個親戚買了一個劏舖投資，位處北角，入場費約90萬，發展商講明首兩年包5厘回報，當時他剛好儲了100萬，有見小小錢可一嘗舖主癮，即刻落疊。這位親戚買完了才問我意見。
我得悉後目瞪口呆，廿幾年前家燕媽媽以身犯險，用真金白銀來證明商場拆售有幾兇險，一片苦心都唔領情，實在有點兒那過。佐敦廣場、旺角東京銀座、深水埗深之都、尖沙嘴首都廣場等相繼淪為「死場」，如果個膽不是沙煲咁大，聽到「劏舖」兩字，很難不打冷震。
早前親戚的劏舖已過了租金保證期，一直找不到租客，開價2,000都乏人問津，原因不外乎「咁細點擺貨」、「多個客都入唔到門口」等，不想變「吉」舖，只好閒時開小班教小朋友畫畫，之後祝他好運。
位處旺區都無運行
「地段佳、人流旺、銀碼細、送兩年租金回報保證」，同一口號嗌完又嗌，但事實是九成劏場變死場，為何那麼多人唔怕死追住買？
其實跟近幾年蚊型私樓大賣的原因差不多，發展商為求促銷和吸盡市場購買力，將入場門檻降到有咁低得咁低，單位就劏到有咁細得咁細，雖然長遠來說屬最欠防守力的住宅類型，但起碼住到人，就算樓市跌市道差，只要低於市價，一定有人租。舖不同，生意差沒人流，蝕租蝕貨蝕埋燈油火蠟和時間。
特別留意，條街幾旺都好，未必可以將地面的人流引入商場，豉油街和砵蘭街夠多人，但東京銀座一樣冇運行。
業權太散、商場缺定位、管理差往往是劏場的死穴，劏場發展商，來來去去得幾個，手法重覆又重覆。仍有人上當，真是無話可說。
假如你有小小哋一注錢，堅持在這個時候投資，兼且要在蚊型劏舖、畸型私樓和迷你工廈（拆售）之中選擇一個，我會建議最後者。
很多一、二人公司需要一個小型office做生意，若果地點好劏得靚，現時還有市有價。但計我話，食花生等新特首有乜樓市新招，謀而後動就最好喇。
郭釗
http://www.fb.com/heaology.edu
本欄逢周四刊出