金融服務界前立法會議員詹培忠（圖）舊年宣佈參選立法會港島直選後，心臟隨即出事，喺港安醫院留院近一個月，最終喺幾近棄選下拎到2,587票。八方噚日見到詹Sir，雖然行動有啲不便，但精神好好兼中氣十足。
佢話舊年6月6日宣佈參選當日可能太激動，當晚瞓到凌晨3點個心隱隱作痛，想落床但對腳冇力，命懸一線之際佢諗到如果叫白車會俾隔籬鄰舍知道，結果死忍到第二朝，叫太太整埋早餐畀佢先自行去醫院，笑言：「我屋企擺咗個觀音，求佢保佑我，如果唔死得就戒酒戒牛。」一向好酒嘅佢之後真係滴酒不沾。
佢形容當時清醒，只係行唔到，但一入院已送入深切治療部，皆因心臟撕裂，前後做過4次手術先執番條命，𠵱家裝咗心臟起搏器，埋單盛惠400萬。難得佢仲識講笑，話當日參選記招展示去澳門賭贏嘅977萬元票據，扣埋手術費、競選經費200萬等，冇乜得剩喇。