賭王何鴻燊四房囝囝何猷君，一向錫妹妹何超欣錫到燶，噚日佢喺微博上載同媽咪梁安琪（四太），同埋哥哥何猷亨去倫敦出席超欣畢業禮嘅相，猷君同猷亨都着晒西裝，畢業嘅超欣就着咗一條露肩白裙，其中一張相仲蹺實猷君影相。
猷君就喺微博留言話：「欣欣高中畢業叻！同家人一起參加了欣欣的畢業典禮，非常激動與自豪，欣欣還考上了非常棒的大學，加油我最最最最可愛的妹妹！哥哥會一直在你身邊支持你！」
胡子彤鼓勵放榜生
至於香港中學文憑試（DSE）今日放榜， 已經離開校園嘅胡子彤同吳肇軒，就以過來人身份，以《多拉A夢》主角大雄同胖虎造型出現，拍咗條搞笑片鼓勵學生，希望大家無論成績考成點，都要跟隨自己嘅興趣發展，而佢自己就係好例子。
胡子彤話當日放榜都好徬徨，以為一定夠分入IVE體育系，去到先知排晒長龍，結果冇晒位，之後入讀浸大副學士傳理系，又發掘到演戲興趣，𠵱家將興趣變成事業。
撰文：馮仁昭
