苗禮德馬房在周三(12日)谷草煞科戰，只有「大爆發」及「開心神駒」兩駒列陣，實行精兵制，而這對馬亦確實各有可取之處。
先講第八場二班1200米之「開心神駒」，今朝由苗禮德太太親自主操，前往內圈踱步作最後備戰，苗禮德不但在欄邊吼實此駒整個出試過程，睇完又趕到機坪接馬，聽取太太匯報，而苗太落馬後拍拍「開心神駒」以作鼓勵，跟住便同丈夫結伴返倉，再研究出擊大計，可謂有晒搏殺手影。
「開心神駒」早前在田草與全港最高分三歲馬「駿皇綵」串Ｑ，輸不足一馬位，「駿皇綵」之後於級際賽亦上名，「開心神駒」今仗回師贏馬路程谷草1200米，在二班只負115磅，絕對是上風馬，有力在年輕騎師麥偉利胯下贏馬唞暑。
至於第二場五班1650米之「大爆發」，大前仗於同程後勁凌厲勝出，之後兩戰跑泥地回一回氣，今仗重返谷草勝途，又到起筷時候。