【本報訊】樓價急升，因為落錯車而上唔返車的例子，比比皆是。今次介紹的元朗鍾屋村設計單位屋主伍文峰（Kenny），就是其中一個活生生「上唔返車」的真實個案，Kenny更兩度落錯車。
Kenny與太太Maco在1994年結婚，儲咗兩年錢夠一成首期後，1996年6月以144.5萬元買入元朗洪水橋朗峰園2座低層H室兩房單位。Kenny當年買朗峰園，是因為近外母有飯開，外母住附近鍾屋村。由於他鍾意滑水（wakeboard），朗峰園只住了幾年便租出去，自己就搬出去，租住西貢近馬鞍山西沙路村屋，一租就十年。他96年買樓，第二年1997年爆發金融風暴，樓價大跌，去到2010年見層樓升番，即使仍未到價，蝕錢都賣，1月份以110萬元賣出，蝕了30幾萬元。這是他的第一次落車。
但他很快又上車，同年3月以195萬元買入荃灣「窮人恩物」一個低層一房單位，312方呎，當年樓市都升得癲，他們在買入單位只有一年時間，便升值數十萬元，抵受不住金錢利誘，2011年3月便賣出單位，成交價247萬元，賺了52萬元。「嗰時荃灣買咗一個好細嘅單位，都係放租，冇諗住自住，因為不嬲住開村屋唔鍾意有𨋢嘅地方，太細，好侷促，我鍾意多見樹木少見人」。不過，Kenny第二次落車後，樓價升不停，其賣出的樂悠居現已升值至約460萬元，比其賣出價高近九成，至今六年仍未能再上車。
Kenny表示，當時賣樂悠居的原因，「我討厭地方細，我唔係好鍾意香港住，去旅行你會見到好多靚嘢，所以賣咗佢……出面太多誘感」。（有後悔賣樓？）「你唔可以咁講，每個人都有經歷，我年輕還有精力去追，現時年紀大唔可以再追，咁不如將資金調去第二度地方，你唔需要睇死一個地方」。Kenny是髮型師，現時樓價高企，並不是一般打工仔可以負擔。
他亦有留意近期不少人都是靠「父幹」才能上車，「其實新生代係冇錢畀首期㗎，供係供得起，係第一炮辛苦，所以咁多要靠父幹，如果兩公婆搵四五萬（一個月）都OK」。他表示，「自己唔係怕供，因為租樓都要咁多錢，係第一下首期，現在冇首期又想過業主癮，就去買日本、台灣、澳洲樓，好過喺香港搏，都係買磚頭」。
唔敢再上車的原因，就是年紀。Kenny話，「我租樓，萬一兩公婆有一個病咗供唔到樓，我唔會畀人收樓，唔掂咪可能租細啲，我唔會被人清倉，可能本都冇埋，但係都係咁講啦，如果你租得十年，嗰舊錢可能都係首期，呢樣就好矛盾。」
「唔係敢唔敢買樓，係成日講有冇講嗰舊首期，我唔夠，因為我要嗰啲都唔係400呎、300呎嗰啲。」（想要過千呎？）又唔係嗰啲，起碼都兩房一廳啦，如果三個人（計埋女兒）淨係困喺一間屋仔仲要畀咁多錢去供，供完層樓都唔係你，可能你都走咗，有啲嘢都帶唔走，咁個個計數方法都唔同，我覺得50歲之後唔好再買樓，當有80歲命，50歲供咩呀，你份工可否令你供到，即係你要有份工你先可以有收入……係咪供幾年之後賺到又賣返出去。」
他奉勸已到50歲的人，唔好諗買樓。「如果你50歲都置不到業，咪搞咁多嘢啦，等抽公屋，因為你嘅收入會一路滑落去，當你喺頂，約有五、六萬收入，會一路一路瀡落去，仲攞舊錢去搏係咪搵自己笨。」
Kenny認為，冇咁大個頭唔使戴咁大頂帽，當買樓後，壓力會很大，「你唔可以唔做嘢呀，屋企人唔可以唔幫你一把去供樓，咁你供親都20、30年，供到70歲時，你買個骨灰龕都要錢，你係咪掃街掃到70歲，係咪公積金可攞得返，真係唔好亂咁去招惹磚頭，50歲唔好再招惹磚頭。」
記者：朱連峰 陳家恩