化妝品連鎖店卓悅老闆葉俊亨名下、呂健威馬房的「大美人」已報煞科日(16日)二班田草1400米，此駒上仗在港初出，於泥地1200米跑包尾，估計今仗一定受到忽視。
不過，睇動態「大美人」絕不似出來陪襯，相反甚有決心爭勝。上周六呂健威已安排「大美人」交由客串騎師沈拿過檔拍跳，當日這對騎練已結伴傾談良久，態度非常認真。到了今朝沈拿亦特意到場，全日獨操一匹「大美人」，再替此駒拍跳，亦同樣見操完呂健威咬實沈拿唔放，威哥聽取匯報外，亦仔細向沈拿講解賽前形勢，試問如果冇機會，威哥又使乜咁着緊？擺明今仗必有所圖！
「大美人」係去年澳洲1600米一級賽香檳錦標亞軍，頭馬「崇敬代表」其後不但勝出維多利亞打吡，亦於1600米G1澳洲堅尼跑獲亞軍，所以「大美人」絕對級數甚高，上仗包尾純因初出熱身性質，兼泥地1200米完全不俗，今仗跑草地1400米隨時見真章。