【本報訊】買樓定租樓好，永遠不會有一個最好答案。做過業主、但因為落錯車而錯過樓市大升浪的髮型師伍文峰（Kenny）認為，租樓始終比較靈活，「租樓你可以年青時搵到錢，租市區大啲好啲，當你搵唔到錢就搬去遠啲，點解咁多人會搬返深圳住，其實就係適應生活，但係如果買樓，你已經困死了，到頭來又冇錢供，賣樓套現，咪又係上唔到車，前半生可以天馬行空，後半生50歲冇乜空間畀你做，呢樣比較現實。」
因此，他寧願花五、六十萬去裝修租樓住，都不買樓，其中一個原因，就是為了個女。「我攞50萬可以出去租到5年，其實兩年加一次租。」加上自己已50歲，事業從高位倒退，賺錢能力減低，女兒又開始讀大學，「好多嘢你唔使錢，屋企都使你錢，我個女F.5啦，過多兩年讀大學，咁我唔可以自己再咁任性，我哋要番舊錢，供佢讀書」
Kenny自從於2010年賣出荃灣樂悠居後，已沒有在香港置業，後來投資海外物業，2013年以220萬港元買入馬來西亞波德申大紅花海上渡假村酒店，供15年，月供1萬多元，首4年獲7%租金回報保證。他每年有時間，都會一家大細去該酒店玩樂，投資自用兩可。他表示，投資海外樓，每月有近1.3萬元租金回報，首4年他就用這些錢在香港租樓，「現時越來越貴（香港樓價），越來越窄啲嘢，就唔係想再去畀層樓去綁住，唔想再揹住層樓過日子，個殼越來越細，但個殼越來越重。」
