32歲袁嘉敏入行8年，前年拍《鴨王》一脫抑鬱，喺兩年內拍咗5套床戲嘅片，孭住「性感女星」呢個名唔易，感情世界更dry足6年，不過佢返大陸登台似乎有啲市場，屋企升級住半山，不過佢早前接受周刊訪問，當自己唔太開心，喺工作上好多都要啞忍。
袁嘉敏喺訪問講出娛圈黑暗，呢兩年推咗差唔多100個飯局，啲價錢由廿萬至百萬，好多時都係透過微信，話去啲「晚宴」或者買張機票去海外工作，去到當地會有人接，亦試過喺大陸啲夜場，被逼去食飯，又去過一啲電影圈前輩嘅飯局，當時有人俾成萬蚊利是，被前輩搶利是，袁嘉敏又話平時叫的士同貨車都被騷擾，有人會問佢床價、有啲就私chat講啲淫嘢。
佢又喺報道中數舊愛，就係前年遇到嘅歐洲貴族男友Kenneth，不過拍拖4個月就分手，頂唔順呢個「離地」嘅男友，有時Kenneth摸袁嘉敏著嘅衫會覺得質地cheap，只要袁嘉敏唔工作就會覺得袁嘉敏係貪錢，又睇唔起香港藝人，袁嘉敏仲話啲屋租都係自己俾。袁嘉敏於報道中就話黎淑賢想介紹男仔，不過對方睇完之前啲報道，唔想見袁嘉敏，袁嘉敏更公開講自己想同港人拍拖，不過大家要經濟獨立，同埋有上進心。