林鄭月娥接任特首之後，政局有啲煥然一新，亦有更多司局長走入社群。雖然放榜對唔少局長嚟講係好遙遠嘅事，但嗰份忐忑之情，相信記憶猶新，適逢文憑試今日放榜，林鄭以及一班局長亦喺前夕紛紛出動，到訪母校為學弟學妹打氣，趁機展示真．connect新風。
劉江華同師弟dem cheers
林鄭噚日中午到訪母校嘉諾撒聖方濟各書院，勉勵考生對自己要有信心。教育局局長楊潤雄原來係九龍華仁仔，同保安局局長李家超係校友，噚日朝早孖住返母校，同學弟一齊喺校園草地列陣高呼：「我哋九華仔，祝大家放榜順利，yeah！」然後齊齊放紙飛機，有啲《哪一天我們會飛》嘅青葱味。
另一新丁發展局局長黃偉綸（Michael）亦到母校荃灣聖芳濟中學，帶領學弟高喊「Hip, Hip, Hooray！」Michael勉勵小師弟：「冇嘢係一試定終身！」覺得後天嘅努力、上進心及鬥志等等，先成就將來係一個點嘅人。
環境局局長黃錦星則返母校聖文德書院做打氣大使，揸機同大家selfie；政制及內地事務局局長聶德權亦到訪母校觀塘瑪利諾書院，分享讀書、事業選擇等心得。聖保羅書院舊生民政事務局局長劉江華同師弟見面兼dem cheers。
食物及衞生局局長陳肇始係跑馬地聖保祿中學嘅校友，噚日更先後到訪銅鑼灣聖保祿學校及何東中學兩間女校。財庫局局長劉怡翔就重返母校聖芳濟書院，同應考同學邊燒雞翼邊打氣，勉勵同學積極裝備自己。公務員事務局局長羅智光、創科局局長楊偉雄、勞福局局長羅致光、運房局長陳帆及財政司司長陳茂波，亦分別透過探訪同留言向考生打氣。
李八方