勞工及福利局局長羅致光（CK）新官上任，最急切相信係處理取消強積金對沖呢個689留低嘅爛攤子。要落實取消對沖，首要梗係擺平勞資雙方，據聞CK已經約實本港3大工會作禮節性拜訪，打聲招呼咁話！
CK本周五率先到訪工聯會，下周一輪到勞聯，24日就去職工盟，下星期仲約咗勞顧會勞資雙方嘅委員飯局，互相認識一番。
勞聯秘書長周小松話，雖然CK今次只係禮節性拜訪工會，見面時間唔會好長，但有機會都會同佢傾吓熱門勞工議題，笑言CK素有橋王之稱，對佢都有啲期望，希望佢可以度出好橋，喺唔損害員工利益下解決取消MPF對沖問題。