曼聯周一喺美國洛杉磯開操，魔迷期待已久嘅中鋒盧卡古報到，首次同大隊操練。雖然官方未公佈盧卡古着幾多號，但佢自己就爆響口，話已經問准咗伊巴謙莫域，繼承件9號球衣。
睇嚟「新魔獸」同新隊友相處得唔錯，除咗同老友保羅普巴有講有笑，老將卡域克亦對佢讚不絕口，而桑馬達仲拎佢對鞋嚟講笑㖭。
首操被球迷集郵
曼聯周一宣佈由愛華頓羅致盧卡古，雙方簽約五年，有再續約多一年嘅條款。官方公佈冇耐，盧卡古就喺老友普巴嘅陪同下，去到曼聯集訓嘅地方，出席球隊首課操練。唔少球迷喺訓練場外等，見到盧卡古嚟都好興奮，爭住同佢自拍。呢課操練都幾輕鬆，球員分成兩隊踢分隊賽，盧卡古着上紅背心，同另一名新兵域陀連迪路夫、普巴、達美安等一隊。
曼聯未公佈盧卡古嘅號碼，上官網只係見到佢仲係0號，但呢位24歲比利時中鋒話，想着伊巴留低落嚟嘅9號球衣，「我一向會問阿媽着幾多號好，我曾經着過10號，因為我阿媽嘅生日係10月10號，係一年入面嘅第10個月，所以我揀10號。我家陣要求着9號，因為我係一名前鋒，前鋒都着9號比賽，呢個係個好冧巴，而且我已經問咗伊巴，我好多謝佢准我用呢個號碼。」盧卡古着9號，唔知安東尼馬迪爾會唔會唔開心呢？佢上季被伊巴搶咗件9號波衫，今季等到伊巴走人，點知件9號都冇返到佢手！
老大哥卡域克都讚
曼聯中場老將卡域克亦好歡迎盧卡古加盟，「盧卡古夠大隻，又識入波，正係我哋需要嘅球員。我唔想將所有責任放晒喺佢身上，但佢真係帶到呢樣嘢畀我哋。」另一名中場桑馬達，就似乎已經同盧卡古打成一片，佢喺更衣室拎咗盧卡古對48號鞋嚟着，就好似入咗巨人國一樣。馬達將相放上社交網站，仲留言：「歡迎盧卡古，呢對係我有史以嚟着過最大嘅鞋！」盧卡古亦轉發咗呢個post。
另外，盧卡古加盟曼聯可以話係英超今夏暫時最大單轉會新聞，英倫三島唔少報紙都頭版報道，好似愛爾蘭《先驅報》，不過佢哋張盧卡古配相雖然同新魔獸本尊都有七、八成似，不過望真啲其實係另一個人，係英國饒舌歌手Stormzy。