女特首林鄭月娥上場後，傳媒焦點轉移咗，可能令前任特首梁振英嘅太太梁唐青儀難得輕鬆，單拖行街兼買電視機。八方同事喺周末下晝4點45分，見到龍蝦坐住政府七人車AM 57去到銅鑼灣時代廣場濕平，身穿藍色polo tee襯黑褲嘅梁太獨自現身，冇咗特首夫人嘅光環，佢身邊未見助手或保安人員隨行，見佢直踩上9樓，先到Starbucks買咖啡，之後到隔籬嘅百老匯睇電器。
買埋$4,990喇叭
由禮賓府搬返山頂舊居，梁太似乎有好多家電要買，顯然已有心水買咩電器，好快就行咗去電視區揀電視，現場有3個職員招呼佢，相當尊貴，佢好專心咁坐喺張高凳邊飲咖啡、邊睇電視、邊留心售貨員講解，有途人認得佢，但佢繼續自在。
最後梁太睇中一部售價$14,980嘅Samsung 49吋大電視，仲有某信用卡做緊$8,980優惠，佢就問咗對方一句：係唔係Smart TV？係唔係掛牆？嗰個售貨員落力講解，佢亦都好爽快拎咗張信用卡出嚟埋單，當時店員就再補充電視係座枱款式。
後來售貨員再向梁太sell埋套$4,990嘅喇叭，梁太表示冇問題，買埋，店員隨即遞上卡片話：「裝完後有咩問題，你一個電話俾我，我哋會到㗎喇！」服務好貼心喎。之後梁太轉去睇焗爐，睇咗約15分鐘就買咗，碌卡寫低送貨地址後走人，落番商場地面，滿載而歸上番七人車走人。
李八方