不少馬迷欣賞賽事時，臉孔露出特別多表情，尤其當自己心水馬即將跑出之際，佢哋直情嗌到失聲咁滯，提起喉嚨猛叫：「頂住，頂住，頂住，搞掂，收錢！」。
馬迷或許覺得這樣地嗌馬有種潛在魔力，能夠隔空幫助馬匹或者騎師出力跑快一些。最新外國就有位馬迷嗌馬，嗌到進入忘我境界，當正自己在陣上正在騎馬搏鬥中，用手狂打自己大髀同屁股，堅到連潘頓的招牌車輪鞭都要行埋一邊。
嗌馬方式因人而異，有啲揸住報紙隨住馬匹奔跑節奏，手口並用地嗌馬；較為激動的，言語間就夾雜別人的母親在內。
又有啲企喺電視機前面，用手遮住自己冇買的馬匹，猛嗌唔好跑上嚟，當正自己有特異功能，可以主宰賽果。
不過說到最誇張者，還係有人跪低嗌馬，大力敲打電視機，一派呼天搶地的樣子，遠看還以為他失去了親人。
無論點都好，叫馬是賽馬文化之一，尤其是在投注額驚人的香港，馬迷嗌到聲沙至叫過癮。旁人對此或不以為然，對當事人來說卻是自得其樂、盡情投入賽馬之中。