特區回歸20周年，首任行政長官董建華竟然賣家業贈興？阿董家族擁有嘅航運公司東方海外宣佈會賣畀國資委旗下嘅中遠海控，呢件事惹嚟幾大迴響，質疑係阿爺畀阿董嘅政治報酬，自由黨榮譽主席田北俊仲喺facebook寸爆：「頭號愛國愛港都撤資走佬？」仲有句溫馨提示：「愛國就千祈唔好攞賺咗嘅錢去外國投資啦！」
叫唔好去投資外國
政商界譁然，皆因492億收購價高得唔合情理，尤其香港航運業前景不被看好，央企仲逆市出手，難怪令人質疑呢次到底係純粹嘅商業決定，抑或係阿爺對老董嘅政治回禮，答謝歷年盡心盡力？
因為叫梁振英落台而被摵咗政協柴嘅田北俊都係咁諗囉，佢好質疑今時今日嘅航運業，係咪仲係咁值錢？又質疑阿董會唔會用呢筆錢，喺番香港或祖國投資？田少連全國政協副主席都寸，皆因冇柴可以再被阿爺摵，自可坦蕩蕩暢所欲言，羨煞向北望嘅人「俊傑」。唔少網民亦對此議論紛紛，Lawrence Law話：「唔愛國愛港（表面上），大陸點會買你老董依盤失敗生意？」Raymond Chan心水好清咁話嘞：「愛國嘅點解唔係送畀國家，反而高價『GOOD』水？」