大家經常去逛嘅海港城，已經有50年歷史，不時與港人同步向前，喺踏入51歲生日時，又向港人獻新猷，海運大廈伸延大樓嘅擴建工程即將完工，獨特建築設計以及270度維港觀景台，預計第四季開幕，極有可能成為香港新地標！
呢個位於海運大廈末端、樓高5層兼三面環海嘅伸延大樓，係由國際知名建築師事務所Foster + Partner設計，位處維港中心嘅地理優勢，梗係要融入設計，結果就有呢個觀景台出現，大樓每層都有觀景台，朝10晚10免費開放畀遊人飽覽維港日與夜，無論小情侶拍拖睇日落，或者一家大細睇夜景，又有新蒲點。
觀景台場內仲設有11間海景餐廳，等大家肚餓嘅時候可以邊睇維港景邊醫肚，同時仲有全新嘅郵輪碼頭出入境大堂，預料今年內會陸續開業以及投入服務。