【科技透視】
上月有超過一半日子都下雨，教不少小店叫苦連天。有小店就靠科技改善問題，位於中半山的公利真料竹蔗水第四代負責人Ben表示，因有加入本地外賣平台App，能抵銷天雨帶來的影響，現時店舖有兩成生意是來自外賣。不過「有辣有唔辣」，有餐廳負責人透露，外賣App抽佣可高達三成，「食水都幾深」，全靠推優惠時薄利多銷。
記者：溫婉婷
公利位於半山蘇豪區，「我哋係半山，夏天時寫字樓啲OL着高踭鞋，行上嚟又遠又熱。」Ben苦笑道。若遇上雨天更是門可羅雀，生意慘淡。由於店內產品全都新鮮製造並不含防腐劑，無法擺放太久，「譬如早排係咁落雨，冇辦法啲嘢要係咁倒。」
有餐廳嘆「食水幾深」
慶幸陸續有外賣平台向公利招手，解決一大問題。Ben坦言，自從加入UberEATS及Deliveroo後，生意拓展至金鐘等較遠地區，每月生意額有明顯提升，「堂食大概每人消費20至30蚊，外賣一張單有100至600、700蚊，最高有800蚊」，現時來自兩大平台收入佔比高達兩成。「一時UberEATS多啲，一時Deliveroo多啲，睇下嗰期邊間做優惠。」
位於九龍城的清真牛肉館，今年3月底加入UberEATS，為獨家合作夥伴。負責人馬太透露，每月來自平台的收入由最初的5%增至8%，帶動整體外賣收入佔比達10至13%。
外賣平台推優惠搶客
不過，也有參加外賣App的餐廳負責人坦言，平台「食水幾深」，平均每張單抽取25至30%金額，「其實個個平台收費都差唔多，如果係獨家合作，就會抽少一點。」
對方續指，事實上餐廳獲得的利潤並不高，只能靠薄利多銷。「佢哋啲優惠推得多嘛，高峯時期一日有幾十張單，都有幫助嘅。不過佢哋一唔推優惠，生意即刻差幾倍。」
近年「燒錢搶客」成為指定動作，各大外賣平台亦不例外，大灑金錢推折扣優惠，50元、20元折扣減免時有推出，另外還要負擔送餐員及市場推廣費用。有餐廳負責人相信，單計推廣期內，外賣平台是「做一單蝕一單，應該都燒咗千幾萬」。
UberEATS香港總經理林灝哲表示，平台會負責所有推廣成本及優惠，最近推出「細食日」等活動，冀幫餐廳拓展業務範圍，「因為小店最難之處，就係得1、2間舖頭點樣將餐廳推廣出去。」
林灝哲稱，目前合作餐廳超過1,200間，並稱大部份合作餐廳會有兩至三成業務增長，會盡量做到每個月的外賣定單錄得雙位數增幅。