【本報訊】公利真料竹蔗水位於半山蘇豪區，從地鐵站出來後，還得乘上往半山的自動扶手電梯或沿着石板街往上爬十多分鐘。公利賣蔗汁為主，亦有賣雞骨草等涼茶，但為何要強調「真料」？皆因這間老字號對蔗十分講究。
唔用黑蔗 避免太燥熱
「我哋唔用黑蔗，用嘅係青蔗。因為黑蔗係用嚟榨成砂糖，如果直接飲會太甜，太『漏』，好燥熱。青蔗就清甜啲，但就寒涼，所以我哋要蒸熟咗先榨，咁就會溫和好多，咩體質都啱飲。」Ben邊榨蔗汁，邊有條不紊地解釋，「同埋一碌蔗要反覆榨十多次，先榨到九成乾，變成一杯蔗汁，其他舖頭只會榨到六、七成乾。」他指着遍地「蔗乾」笑言，果然夠「真料」。
原來公利初代創辦人是蔗農出身，為本港原居民。Ben透露，先輩於元朗一帶種植蔗田，主要售予其他涼茶舖作蔗汁之用，後來發現直接出售蔗汁利潤更高，索性自己開店賣蔗汁。一開，就開了差不多70年。
「當時佢哋要將啲蔗紮成一札札，啲蔗田喺村入面，貨車無法入去，所以要先上木頭車運出馬路，再搬上貨車運去碼頭，然後搭船到中環碼頭，再搬上另一架車，先運到上嚟荷里活道。」
踏入六、七十年代，家中男丁紛紛到市區工作，蔗田日漸荒廢，公利方轉為從內地入口青蔗。「每日八、九點就會運落嚟舖頭，但因為啲蔗最多只可以留多一日，所以我哋每日訂蔗之前都要望天氣報告做人，落雨呢就會訂少起碼一半，寧願唔夠賣都唔想浪費。」