唔知現任70個立法會議員，大家最冇印象係邊一位？八方相信向來低調嘅勞工界議員、勞聯潘兆平一定榜上有名！講完個名都未load到佢個樣？查實一啲都唔出奇，就等八方揭開呢位「而我不知道誰是潘兆平」嘅神秘面紗！
現年60歲嘅潘兆平同八方講，小時住喺筲箕灣柏架山啲鐵皮屋，背山面海，都算坐擁維港景色，當時因為家境唔好，娛樂唔多，不外乎同其他小朋友通山走，放紙鳶、捉金絲貓、射波子、拍公仔紙咁。
18歲做車房
想當年香港經濟未起飛，唔少細路哥都要做童工幫補家計，潘兆平同樣細細個出嚟做嘢。佢話7、8歲時已經學識煮飯，11、12歲時更加到酒樓賣點心，好記得嗰時小學返下午校，一朝早孭住個盤喺酒樓賣點心，賣一日都係得6蚊，但咪睇少呢6蚊，50年前已經係好多錢！之後為咗賺多啲錢，佢連洗碗都做埋，因為洗碗有12蚊一日。
除咗賣點心，潘兆平細個亦會喺屋企幫手穿膠花，17、18歲就直頭到車房做嘢，做做吓變埋跟車送貨。唔知係咪呢段捱窮嘅歷史，令到佢投身工會幫基層發聲？