李健宏（KB）百足咁多爪，既係鼓手又係歌手，更加係電視節目主持人。但最令人印象深刻，相信就係佢主理嘅惡搞節目《玩爆你個腎》，適逢今年係《爆腎》七周年，KB特別推出新歌《我最喜愛的YouTube節目》為《爆腎》慶祝，同時日前佢又喺觀塘工業區街頭，向本報示範點快速玩爆途人個腎。KB首先用一個開咗窿嘅水樽，企喺牆邊扮小便，當途人經過嘅時候突然轉身靠嚇，然後就隨機搵從後衝到途人身邊要求selfie，最後就企喺斑馬線，阻住剛過馬路嘅途人，每次成功玩人嘅KB都把握機會，即刻同佢哋宣傳《爆腎》同埋佢首新歌。
認真做無聊事
KB接受訪問時回顧《爆腎》成立嘅初衷，佢話：「當時我哋得兩條友戇居居，見到YouTube呢個平台，於是就諗住拍啲無聊嘢畀friend，完全冇諗過任何hit rate同view數。」佢自嘲係用最認真嘅方法，去做啲最無聊嘅事，七年嚟《爆腎》成功累積唔少fans，KB依然希望帶歡樂畀大家。除咗整蠱人，近年KB亦製作多咗各類型嘅短片，佢話：「我哋拍過講練體能嘅《操爆你個肺》，同開始拍一個叫做《爆腎實驗室》主要喺街頭試做唔同嘅實驗，例如測試吓香港人有冇愛心等。」
撰文：馮仁昭