上屆特首梁振英6月30日晚，坐車離開禮賓府，卸下特首職位，連帶梁唐青儀都再唔係特首夫人。不過前日《蘋果》就見到唐青儀坐住「AM」車牌嘅政府車，到老銅買電器。
根據05年發表嘅《行政長官報酬及離職後安排獨立委員會報告》，認為特首卸任後主要事項為「推廣大使」，故前特首及家人雖要遷出禮賓府，但仍可以獲政府提供辦公室及行政支援，以便進行推廣及禮節性工作。
前特首又可獲政府提供汽車及接送服務，不過唐青儀坐「AM」車去買電器，就未必包括喇。報告又建議，前特首及前特首夫人可以終身使用香港國際機場貴賓室。終身享有嘅福利仲有一項，就係醫療及牙科等福利，連帶21歲以下子女都可以受惠。
另外仲有一點，由於前特首仍屬公眾人物，故可獲保鑣及住所保安設備安排。