求驗客手記:大換血再簽芬超金靴東方古高好射得

求驗客手記:
大換血再簽芬超金靴
東方古高好射得

東方龍獅上季喺港超聯拎唔到盃,首次出戰亞冠盃分組賽就六場輸五場,球隊今季痛定思痛大換血,仲搵咗啲好有份量嘅外援加盟,噚日就簽咗個芬蘭國腳前鋒古高,同幫澳職西悉捧過亞冠盃嘅巴西中場域陀沙巴,連埋南韓新中堅曹泰根,夠晒新鮮感之餘,相信亦有一定戰力,總監梁守志搵到呢啲高質外援,目標除咗要同傑志鬥過,亦想爭取再踢亞冠盃。

古高打開歐洲外圍賽

雖然南華自降港甲,但東方冇因為少咗隊勁敵放軟手腳,加上有國內贊助開水喉增兵,所以就簽入李志豪、林學曦同羅港威,新援就有早前公佈嘅南韓中堅曹泰根、古高同沙巴,其中古高原先踢緊澳職紐卡素噴射機,但噴射機今季改由前港足教練摩力克接手,古高唔多啱用,就決定以借用形式轉會東方,而兩會齊齊承擔佢啲人工。
球迷咪認錯,呢位古高唔係以前NBA公牛王朝嗰位古高,亦唔好叫錯佢做荷蘭名宿高古,身高1米89、30歲嘅古高本身係芬蘭U21代表,入過芬蘭國家隊一次,喺國內踢漢卡等大會,又踢過歐協盃同歐霸外,08同15年仲兩度成為芬超神射手。至於有睇開澳職或亞冠嘅球迷,可能對27歲嘅域陀沙巴有印象;呢位出身巴西華斯高同法林明高嘅青年軍,22歲就加盟意乙布雷西亞,14/15年轉戰亞洲,幫澳職西悉尼流浪者成為亞冠盟主,今年初重返歐洲,效力荷乙幸運薛達。
我求大俠收到呢兩位仁兄嘅資料後,即刻上網睇吓佢哋啲比賽片,古高有技術,左右腳都射得,又有遠射腳頭,踢法好全面,但北歐兵嚟香港初初肯定要適應天氣;沙巴就係左腳仔,有技術同組織力,罰球命中率都幾高,中前場有兩件新援,東方夠晒料擺大頭啦。

梁守志:乜都要爭

總監梁守志話上季成績唔多理想,聯賽臨尾香最傷,而第一次打亞冠其實預咗唔會有好成績,分組賽出局可當攞經驗,今季有基奧雲尼同羅拔圖等主力走咗,但補充幾位外援同本地兵都有份量,應該有刺激作用,相信同宿敵傑志有得鬥。佢仲話球隊搵得呢個級數嘅外援,新季梗係乜都爭,希望可以透過亞冠外爭取躋身分組賽。東方公佈埋呢兩件新援,組軍工作大致完成,今朝喺京士柏運動場,一於以全新形象開操迎接新挑戰。

此古高不同彼古高

東方簽古高唔係高古,高古(Phillip Cocu)係喺08年退役嘅前荷蘭國腳,家陣係荷甲燕豪芬主帥。高古球員時代以全能見稱,除咗守龍幾乎咩位都踢得。至於籃球壇以前就真係有個古高好威水,90年代公牛王朝除咗佐敦、柏賓同洛文之外,不得不提就係最佳第六人古高(Toni Kukoc),佢幫公牛喺96至98年三奪NBA總冠軍,00年離隊。